冰室可以話係陪伴住香港人成長，由70年代開始興起，今次小編就會為大家介紹5間必食冰室！
嘉樂冰室
地址：荃灣新村街40B號地下
呢間位於荃灣嘅舊式冰室，招牌食物就係「小奄列」啦！佢嘅火腿小奄列係用七粒雞蛋同埋淡奶製作而成，口感非常之幼滑！而且一啲都唔「小」，分量十足！另外佢嘅豉油王雞翼真係叫人食過之後返尋味！推薦！
維記咖啡粉麵
地址：深水埗福榮街62號及66號地下/ 北河街165-167號地下D號
呢間店嘅招牌菜係：湯汁濃郁嘅豬潤牛肉麵。唔少人都會特登過去深水埗食架！另外，佢既咖央西多士甜味十足，蛋漿煎得均勻，有好濃嘅蛋香味！香港嘅地道飲料店舖當中都應有盡有，尤其係絲襪奶茶，香濃順滑～冇得彈！
十字冰室
地址：西環西營盤高街48-78號恆陞大樓地下12號舖
十字冰室嘅設計結合左香港嘅懷舊元素同埋摩登嘅風格，既有傳統嘅冰室美食，更加有十字牌牛奶產品作為食材！包括招牌冰鎮濃滑奶茶、香濃蕃茄牛尾湯通粉、火腿爆蛋菠蘿包、十字芒果木瓜牛奶麥皮，亦有新派常餐All Day Breakfast、各式自家調配特飲及甜品小食。
華嫂
地址：元朗屏山坑頭村\觀塘敬業街55號皇廷廣場1號舖\灣仔謝斐道272號杜智臺地下3-4號舖\尖沙咀棉登徑8號地下G7-G8號舖
華嫂冰室既招牌菜係番茄蛋菠蘿油，建議搭配幼滑奶茶一同享用，係一間連余文樂都成日係Instagram推薦既冰室！人氣極高，永遠都要排隊但大家永遠都心甘情願咁去排，菠蘿包係熱辣辣既再配合融化既牛油~~一流！
勝香園
地址：中環美輪街2號排檔
勝香園位處中環，係冰室之中既老字號！番茄湯麵同各式脆脆最受歡迎。作為一個蕃茄控，勝香園最出名嘅茄牛通係必定要試，蕃茄湯底非常夠味，仲會食到好多蕃茄肉，每次黎都會係咁飲啲湯，牛肉都無梳打粉味。加埋杯凍飲都係40幾蚊，難怪成日咁多人排隊。
唔知大家試過咁多間美味嘅冰室未呢？以上呢5間冰室，無論係假日自己去食，或者係帶嚟香港旅行嘅朋友食都非常之適合架！