首間刺蝟咖啡店登陸香港啦！坐落九龍灣得寶商場，KURI Café唔單止以得意刺蝟作咖啡店主題，現場更有多隻可愛的刺蝟，刺蝟區每日有多場刺蝟導賞團供大家預約。可愛爆燈！仲唔快啲約埋班friend一齊嚟「刺蝟的國度」朝聖一番？！
KURI Café位於九龍灣得寶商場地下一層正中央的位置，一到咖啡店，最吸睛嘅就一定係同成年人一樣高嘅巨型刺蝟吉祥物。打卡位，你識做啦！
而KURI Café嘅廚房同付款處都用上開放式設計，而餐桌就用上夾板木枱椅，打造出溫柔又舒適的感覺！KURI Café中央位置亦不斷播放刺蝟影片，餐單亦印上刺蝟吉祥物Logo，連熱鮮奶咖啡都拉上刺蝟拉花，可愛爆燈！
想探吓一隻二隻小刺蝟？KURI Café設有刺蝟導賞團供大家預約，令大家更了解刺蝟的特性。刺蝟導賞團由每天下午1時至下午9時運作，每1小時1節，每節半小時，導賞人數上限為10人，額滿即止。期間參加者有機會免費餵食刺蝟，但萬萬不能觸摸刺蝟！緊記因參加者眾多，一定要whatapps 日子，時間，人數，姓名及電話予KURI Café預先登記！
用膳後唔捨得可愛刺蝟，甚至想入手一隻帶翻屋企？KURI Café另一邊有多款與刺蝟有關的精品，唔單止有常見刺蝟公仔，仲有印上刺蝟圖案嘅餐具，又係時候大掃貨！
睇完好想去首間本地刺蝟咖啡店KURI Café朝聖一番？大家緊記預約早啲刺蝟導賞團啦！
Images from Facebook @Kuricafe and Ublog